Subscribe Twitter FaceBook

اعلانات توظيف جوجل

انضم لجروبنا على الفيسبوك .. تصل رسائلنا مباشرة
===========================
http://www.facebook.com/home.php?#!/group.php?gid=238212052935

الاثنين، 7 ديسمبر، 2009

اخلص من كراكيبك على طريقة ال Feng Shui !



أول حاجة هتقولها لي: نعم؟! فينج إيه؟! أقول لك أنا يا سيدي: ال Feng Shui دي فلسفة صينية قديمة نشأت منذ أكثر من 4000 سنة، بتعلّمنا إزاي ممكن نحقق التوازن والتناغم مع البيئة المادية المحيطة بنا، حتى نصل لحياة إيجابية خالية من التوتر.


الطاقة هنا هي المتولدة من الأثاث والعوامل المحيطة بالإنسان والتي تؤثر على حياة الإنسان وصحته، ومزاجه، وعلاقاته بالآخرين وكل ما يحيط به.


يعني مثلاً إزاي ممكن تصمم غرفة مكتب تشتغل فيها تكون بتساعد على الإنجاز؟ إيه الألوان اللي ممكن تسبب الاكتئاب أو العكس؟ بعبارة تانية هي فلسفة "تحقيق التوازن بين الإنسان ومحيطه".



الفينج شوي بيناقش مواضيع كتيرة ليها علاقة بالديكور والأثاث، الموضوع اللي هنتكلم فيه النهارده هو الكراكيب! أيوة الكراكيب اللي مالية بيتك، وغرفتك، وحياتك كلها وأنت مش حاسس بيها، إيدي على أيدك نتخلص منها.

لكن إيه هي الكراكيب الأول؟


قاموس أوكسفورد بيعرف كلمة الكراكيب clutter على أنها مجموعة الأشياء غير المرتبة وغير المنظمة؛ إلا إن معنى الكراكيب في الفينج شوي مختلف، الكراكيب في الفينج شوي أربعة أنواع:


أشياء مش بتستخدمها أو مش بتحبها.
أشياء غير مرتبة وفي حالة فوضى.
أشياء كثيرة في مساحات صغيرة.
أي شيء غير مكتمل.


دول الأربع حاجات اللي لازم تعتبرهم كراكيب وتتخلص منهم.. لكن ليه تتخلص من الكراكيب؟ لو عرفت الكراكيب دي بتعمل فينا إيه وتأثيرها السلبي علينا إيه هتنضم لي فوراً!



الكراكيب بتسبب التعب والكسل: طبعاً، ما هو منظر الدنيا وهي مكركبة بيخليك حاسس إنك عمرك ما هتعرف تنضف، وده بالتالي بيسبب لك كسل.


الكراكيب بتخلينا نعيش في الماضي: لأنك مش سايب مكان لحاجة جديدة تكون موجودة!


الاحتفاظ بالكراكيب يضيّق المكان


الكراكيب تصيبك بالخجل: كام مرة اتكسفت تعزم حد عندك لأن البيت مكركب، ولأنك ما عندكش مكان؟


الكراكيب تضاعف عملية التنظيف


الكراكيب تمثل خطراً على صحتك: أيوة فعلاً، الكراكيب بتجمع تراب وبكتيريا حواليها، وده بيضرك على المدى الطويل.


الكراكيب يمكن أن تصرف انتباهك عن أشياء مهمة: إن كل شيء تمتلكه يملك حيزاً من انتباهك، وكلما قلّت كراكيبك كلما تركت مساحة في مخك للإبداع والتفكير في أشياء جديدة.



طب ماشي.. اقتنعت بالكلام ده كله.. تبتدي إزاي؟!



الأول: لازم تعمل قائمة بالأماكن اللي مكركبة عندك وترتبها من الأكثر كركبةً للأقل كركبة، مثلاً المحفظة، درج المكتب، الدولاب، تحت السرير وهكذا.


الخطوة الثانية: إنك تحمس نفسك؛ فكر إن حياتك هتتنظم وتتغير وإن الدنيا هتوسع.


الخطوة الثالثة: والأهم، إنك تجهر 5 صناديق وتحطها قدامك وتبتدي تشتغل.. لكن إزاي أقسم الصناديق دي؟!


الصندوق الأول

صندوق النفايات، وده ترمي فيه كل الحاجات اللي متأكد إنك عمرك ما هتستخدمها ولا حد تاني هيقدر يستفيد منها.

الصندوق الثاني

صندوق الإصلاح، وده تشيل فيه الحاجات اللي لازم تتصلح، وحدد لنفسك فترة زمنية محددة لتصليحها؛ فإذا انتهت هذه المدة ولم تصلحها، ارمها على الفور.


الصندوق الثالث

صندوق الصدقات وإعادة الاستخدام، وده تحط فيه الحاجات اللي إنت مش محتاجها؛ لكن ممكن غيرك يستفيد منها زي الورق، الزجاجات، الملابس، الكتب.. إلخ.


الصندوق الرابع

صندوق المرتجعات، وده تحط فيه الحاجات اللي لازم ترجعها لأصحابها وتحدد هترجعها إمتى؟


الصندوق الخامس

صندوق مؤقت، وده تحط فيه الحاجات اللي عايز توديها غرف تانية في البيت أو لسه مش محدد هتعمل فيها إيه بالظبط.



بتنفيذ الخطوات البسيطة دي أراهنك على أن حياتك هتتغير تماماً وهتحس بحلاوة النظام والتخلص من الكراكيب.

**فكرة المقال مستوحاة من كتاب عبودية الكراكيب، للمؤلفة: كارين كينج ستون، ترجمة: مروة هاشم عن دار شرقيات.

0 التعليقات:

إرسال تعليق

احدث الوظـــــــــــــــــائف التي تم استعراضها